Tríptico no que se estudan os costumes de Nadal doutros países do mundo. Inclúe os seguintes apartados:

• Portada, onde se pon o nome do país elixido e se colorea un boneco de neve.
• Onde está?: coloréase o país nun mapamundi e escríbese a que continente pertence.
• Cal é a súa bandeira?: debúxase e coloréase a bandeira dese país.
• Costumes de Nadal: inclúe varios apartados. Débese concretar que días celebran o Nadal nese país, se se fan regalos uns a outros, que outros costumes de Nadal teñen, en que se parecen a España na súa maneira de celebrar estas festas, que comidas típicas preparan e un exemplo dunha comida típica de Nadal.
• Que idioma falan?: débese poñer que lingua(s) falan nese país. Aquí inclúese un subapartado de “Vocabulario de Nadal” para que o alumnado traduza algunhas palabras e expresións do galego ao outro idioma.

O ideal é que cada alumno/parella/grupo busque información sobre un país diferente e faga un tríptico para colgar na aula.

Debe imprimirse en horizontal e por ámbalas dúas caras, para que poda dobrarse e formar un tríptico.